عبدالغفار محمد صالح عكاشة مشرف عام
المساهمات : 51 تاريخ التسجيل : 17/08/2010 العمر : 70
| موضوع: قصيدة أماني العيد - للشاعر د.إبراهيم عبد العزيز الخميس سبتمبر 02, 2010 1:37 am | |
|
أماني العيد
كل ما يهل صباح العيد
تهيج الذكري في الوجدان
أقول في الجاية عايز أرجع
ليه أقضي أيامي في أحزان
ومن بنك السنين أدفع
محال شيك العمر ...يرجع!!
****
أماني وإبداعات كيان
وغنية جميلة من فنان
تغازل أفكاري تتبدع
صادقة زي غزالة البان
تواجه الموت وتتفدع
تخاطب الذكري والوجدان
وتسرح بي كل مقطع
لأهلي والجيران!
بس!!! لو شيك العمر.. يرجع!!
****
وكل ما الأماني تضيق
أقول الرحمة والإيمان
أقوم أتوضأ بالإبريق
وأصلِّ إتنين
أعيد وأعيد
و كل ما السُبل تقطع
أقرأ الفاتحة والرحمن
عشان تتفك كرب الضيق!!
وأترحم علي رمضان
ليالي الدين
وبعد الناس بتتفرق
في يوم العيد
علي بيضتين
أفك الريق
وأشرب باقي قمر الدين
وأصلِّ علي الحبيب ياسين
وأقول لكل حبيب وصديق
أنا في الجاية عايز أرجع
وفي كل عيد
أعيد وأعيد
****
وعيدي سعيد
لو ألملم الأحزان
أعيش الباقي في السودان
يا عزة!!...الغربة ما بتنفع
اسمح ليّ عايز أرجع!
***
وكل ما يهل صباح العيد
بعد رمضان
تهيج الذكري في الوجدان
لبلدي ...للسودان
أقول في الجاية عايز أرجع
لأهلي والجيران
لأرقو...شجر الطرفة والقيزان
للبنطون ...وللمشرع!
يا عزّة!! الغربة ما بتنفع!!
أسمح لي عايز أرجع
لأهلي والحبان!!
إبراهيم عبدالعزيز عثمان
****جزي الله الأخ د. إبراهيم خير الجزاء علي هذه القصيدة الرائعة والتي أرسلها لي عبر الإيميل لنشرها في هذا المنتدي – معتذرا عن عدم نشرها مباشرة بالمنتدي نسبة لعدم ظهور شريط الخطوط لديه – هذه المعضلة موجهة للأخ محمد نور لتوضيحها . | |
|